Þetta geri ég oft um helgar, til þess að eiga eitthvað gott að narta í og til gefa börnunum nammi með góðri samvisku. Ef ykkur finnst hrískökur með súkkulaði góðar er þetta eitthvað fyrir ykkur 🙂
Þetta er kannski meira hugmynd en uppskrift. Súkkulaðið er brætt og blandað saman við það allskonar gúmmilaði. Þetta er alveg einstaklega góð leið til að koma allskonar hollustu ofan í litla munna t.d. sesamfræ, sólblómafræ osv.fr.
Það eru þrjár leiðir sem hægt er að fara varðandi súkkulaðið
a) Bræða yfir vatnsbaði 200 g af 70 % súkkulaði,eða 56 % súkkulaði eða blanda 50/50
b) Búa til ykkar eigin súkkulaði, sjá uppskrift hér af: ofursúkkulaði
c) Fara millivegin og bræða 100 gr af 70 % súkkulaði og bæta út í það: 4 msk kakó/ 4 msk agave/ 4 msk kókosolía
Blandið svo saman ca 3-4 hrískökum og svo 4-5 dl af einhverju sem ykkur finnst gott. Semsagt samtals um 8 dl. Getur verið Kornflakes, kókosflögur, möndlur, hnetur, döðlur, rúsínur, sólblómafræ, sesamfræ, Goji ber, en möguleikarnir eru óendanlegir, það er það sem er svo dásamlegt, maður fær aldrei leið 🙂
Hér er ein hugmynd:
4 hrískökur
2 dl kornflakes (Solla er með glúteinlaust og sykurminna kornflakes)
0,5 dl pecan hnétur
0,5 dl döðlur, mjög smátt saxaðar
1 dl möndlur
Setjið í skál, blandið vel og hellið súkkulaðinu yfir og blandið vel saman.
Setjið á bökunarpappír í kökumót eða eldfast mót og blönduna í.
Kælið í 1-2 klst eða stingið í frysti í ca 30 mín
Skerið svo í bita eftir smekk
Nammi namm 🙂
Það er best að geyma þetta nammi í ísskápnum því það fer að molna aðeins niður ef það stendur lengi í stofuhita.
Þetta bjargaði mér alveg þegar yngsti drengurinn var nýfæddur. Hann fæddist í janúar og fékk RS vírusinn 3ja vikna og þurfti að fara á spítala í nokkra daga, það var lítið sofið og stelpurnar mínar 2 voru líka veikur á sama tímabili. Oft langaði mig bara að detta ofan í Æðibita kassann og klára hann á 5 mínútum til að fá einhverja “orku” (og það var alveg gert 😉 ). En ég var dugleg að mixa svona nammi og fannst æði að stinga upp í mig bita þegar mig vantaði orku og kraft. Hugsa að ég hefði bætt vel á mig á þessu tímabili ef ég hefði ekki haft þetta við hendina.
Published by