Bounty-barinn sem breytti um lífstíl

Þessi kaka/nammi sló algerlega í gegn á mínu heimili um síðustu helgi. Ég bjó hana til áður en við fórum í veislu til þess að óþols-pían mín gæti fengið sér eitthvað mjög gott.  Hún smakkaðist líka einstaklega vel með kaffibollanum síðastliðin sunnudagsmorgun, vínarbrauð hvað ?   Þetta minnir heilmikið á Bounty nema bara aðeins pínu smá hollara 🙂

Botninn:

• 1 bolli döðlur (látið liggja í bleyti í ca 20 mín svo verði mjúkar)
• Vatn, eins lítið og þarf til að mauka döðlurnar
• 3 bollar kókosmjöl
• 1/4 bolli kókosolía (við stofuhita)
• 1/2 bolli malaðar kasjúhnétur
• 1 tsk vanilla
• smá salt
• 3-4 msk kókospálmasykur

Aðferð:

1. Byrjið á því að búa til döðlumauk, blandið saman vatninu og döðlunum í matvinnsluvél, í mini-matvinnsluvél, með töfrasprota eða blandara, bara það sem ykkur finnst þægilegast. Reynið að nota eins lítið vatn og þið komist af með svo kakan verði ekki of blaut.
2. Maukið Kasjúhneturnar (ég nota mjög mikið mini-matvinnsluvél í svona verk).
3. Blandið öllu saman við döðlumaukið og vinnið vel saman. Setjið deigið á bökunarpappír og kælið.
4. Bræðið  ca 150 gr af 70 % súkkulaði eða búið til ykkar eigið súkkulaði og setjið yfir kökuna.  Ef þið bræðið súkkulaði borgar sig að setja 1-2 msk af kókosolíu út í svo það verði ekki of hart og verði erfitt að skera í litla bita.

Döðlumaukið búið til – mjög fljótlegt með töfrasprotanum

Það er hægt að gera eina stóra köku eða lengur (þá þarf meira súkkulaði til að hjúpa), í upphaflegu uppskriftinni býr hún til kúlur og dýfir þeim í súkkulaði, ég gaf mér ekki tíma í það í þetta skiptið og ekki viss um að ég hafi þolinmæði í það hvort sem er 🙂

Hér fann ég þessa uppskrift, það eina sem ég breytti var að setja meira af kasjúhnetum og bætti við 3-4 msk af kókospálmasykri.

Bætt við síðar:

Ég hef gert þetta nammi nokkrum sinnum undanfarið og fyrstu skiptin gerði ég það samkvæmt uppskrift, samviskusamlega.  En undanfarið hef ég gert það öðruvísi þ.e.a.s. sett kókosmjöl, malaðar hnetur, kókossykurinn, vanillu og salt í matvinnsluvél og blandað saman, sett svo eina og eina döðlu út í (búnar að liggja í bleyti áður) og unnið vel ásamt kókosolíunni. (Sleppi því að búa til döðlumauk).

Með því að gera þetta svona verður kakan/nammið miklu stökkara þar sem ekkert vatn er lengur í uppskriftinni.

Verði ykkur að góðu 🙂