Ef þið hafið ekki enn heyrt um REKO þá mæli ég með því að bæta úr því hið snarasta. REKO er glænýtt fyrirkomulag hér á landi. Þetta snýst um að stytta bilið á milli bænda og neytenda og einfalda verslun beint frá býli. Hér er grein sem útskýrir þetta betur en í stuttu máli virkar þetta svona:
Þú skráir þig í REKO hóp á facebook, Það eru komnir 3 hópar á Facebook núna: REKO Vesturland, REKO Reykjavík og REKO Austurland. Einu sinni í mánuði (eða það er planið skilst mér) er búinn til viðburður um afhendingu. Þar inni skrá seljendur hvað er í boði, hvað það kostar og hvenær þarf að vera búin að panta. Þar geturðu pantað eða sent tölvupóst á netfang seljanda. Þú gengur svo frá greiðslu áður en kemur að afhendingu. Þegar kemur að afhendingu mætir þú á svæðið og sækir þínar vörur.
Ég sá þetta auglýst í síðustu viku og fannst þetta svo sniðugt að ég varð að vera með í fyrstu afhendingu og sjá hvernig þetta færi fram og en sérstaklega var ég auðvitað spennt fyrir þeim vörum sem voru í boði.
Það sem ég keypti í þessari fyrstu tilraun voru 2 heilir kjúklingar frá Litlu gulu hænunni og 2 kg af kjúklingabringum. En fyrir þá sem ekki vita eru kjúklingarnir frá Litlu gulu hænunni aldir á óerfðabreyttu fóðri ásamt heilu byggi og grænmeti fyrir utan það að hafa gott pláss og spóka sig úti þegar veðrið er gott. En einnig nældi ég mér í 3 kg af nautahakki frá Hálsi í Kjós. Kjötið er af Galloway/Angus nautgripum sem eru 100 % grasfóðraðir. Það var ótrúlega margt spennandi í boði en ég ákvað að byrja á þessu. Mér fannst verðið gott og bara örlítið dýrara heldur en venjulegur kjúklingur (alin á erfðabreyttu soja og maís eins og flestir kjúklingar) og venjulegt nautahakk.
Afhendingin í Reykjavík fór fram á bílaplaninu hjá Krónunni, Lindum.
Nú hlakka ég bara til að elda eitthvað gott úr þessu úrvals hráefni 🙂
Sjáumst vonandi á næstu REKÓ afhendingu 🙂
Published by