Tag: vikumatseðill

Jæja, nú reynir á útsjónarsemi og skipulag í þessari viku.  Það hefur gengið erfiðlega að vera undir hámarkinu svo núna er síðasti séns að redda málunum 😉  Þetta virðist ætla að verða önnur veikindavika og svo er vetrarfrí í skólanum í lok vikunnar.  Mér sýnist á ástandinu á mannskapnum að það verði bara spilað, púslað, haft kósý og örugglega bakað eitthvað gott.  Hápunktur vikunnar er um helgina þar sem vinnustaðurinn minn heldur Árshátíð út á landi og verður það nú aldeilis stuð fyrir hjónakornin að komast aðeins frá börnum og búi og slaka á og njóta lífsins í sveitasælunni.

Mánudagur –   Ljúffeng linsubaunasúpa og spelt bollur.   Einn sá ódýrasti matur sem finnst í heiminum.  Nýbakaðar spelt bollur lyfta svo máltíðinni heilmikið upp.

Þriðjudagur –  Spæld egg, ristað brauð og grænmeti.  Einfalt og fljótlegt á þriðjudegi.  Brauðið kaupi ég í Kökulist, Firðinum, svo ótrúlega gott súrdeigs spelt brauð sem er það besta sem ég hef fundið.

Miðvikudagur –  Taco súpa.   Þessi uppskrift er búin að vera lengi á leiðinni á vefinn.  Krakkarnir elska þessa súpu.  Hún er snilld ef það er til smá afgangur af hakki (uþb. 3 dl) Tek stundum hakk afgang og set í frysti til að eiga í þessa súpu.

Með súpunni mæli ég með þessu lífræna nachosi (ekki búin til úr erfðabreyttu korni)  sem er alveg svakalega gott og fæst í heilsuhillum víðsvegar um bæinn, ég hef keypt það í Nettó.

Fimmtudagur –  Grjónagrautur.  Hýðisgrjónagrauturinn með heimagerðu möndlumjólkinni.

Föstudagur –  Kalkúnaborgarar í heimgerðu hamborgarabrauði.  Eftir tiltekt í frystinum fann ég pakka af kalkúnahakki sem ég keypti í Fjarðarkaup um daginn.  Mjög ódýr matur.  Ég rakst á svo girnilega uppskrift af borgurum og heimagerðu hamborgarabrauði í Heilsuréttum fjölskyldunnar.  Ég hlakka mikið til að prófa þessa uppskrift.  Sætar franskar kartöflur með og væntanlega sollu kokteilsósa fyrir yngri deildina líka 😉

Laugardagur –  Árshátíð  og því þarf ekkert að hugsa um mat þennan daginn.

Sunnudagur –  Lax með mangósósu og sætum kartöflum.  Á sunnudaginn er komin nýr mánuður og ég ætla að fagna því með því að hafa lax í matinn. Lúxus sem ég kom ekki inn í skipulagið í febrúar 😉

Í frystinum eru til jarðaber og bláber fyrir drykki,  spurning hvort ég komist í fjarðarkaup til að kaupa frosin ananas eða mangó.  Annars verða bara epli í græna góða á morgnanna.

Þar sem ég kem til með að vera svolítið heima þessa vikuna ætla ég að nota tækifærið og nota það sem til er til að baka og búa til sjálf.  Í dag bjó ég til dæmis til kanil kex, bananabrauð og Nutella hvað? súkkulaðihnetusmjör, það er ekki hægt að kvarta yfir því 🙂   Oft leynist hitt og þetta í skúffunum og hægt að töfra fram dásamlegar veitingar 🙂

Vonandi verður vikan sem best hjá ykkur öllum <3

Þá hefst þriðja vikan í sparnaðarátakinu, nú þurftum við að fara að spýta í lófana,  bretta upp ermarnar og allt það til að ná takmarkinu en þessi vika verður sennilega smá áskorun því elsta skvísan er að fara í hálskirtlatöku á þriðjudaginn og verður vikan því heilmikið pússluspil varðandi vinnu og annað skipulag.   Litla krúttið er með lægsta sársaukastuðul sem ég hef séð og það er sko ekkert grín,  það fer sko allt á hvolf við það eitt að fá flís eða bara finna örlítið til í fætinum þannig að ég bý mig undir svakalega viku sem yfirhjúkrunarkona á heimilinu.  Við fórum í gær og keyptum nokkrar dollur af mjólkurlausum ís og svo þarf að kaupa slatta af kókosmjólk, Sollu-mangósafa og allskonar ísgerðarefni fyrir heimatilbúna framleiðslu.  Ég hugsa að ég sé strax komin í mínus á fyrsta degi.  Hún fékk að velja kvöldmatinn í gær án allra athugasemda þar sem hún fær eitthvað lítið að borða á næstunni og við vorkennum henni öll svo ótrúlega mikið en ég ætla sko ekki að segja ykkur hvað hún valdi, það er sko ekki birtingarhæft hér 😉

Mánudagur:  Lambagúllasið sem ég eldaði ekki á föstudaginn.  Grænmeti og hýðishrísgrjón með.  (Þarna kemst upp um mig, splæsti í Piccolo tómata, ég bara stóðst ekki freistinguna.   Miðstelpan mín sagði líka, mamma keyptirðu nammi í búðinni 😉

Þriðjudagur: Ætli ommiletta verði ekki bara tilvalin á þessum þriðjudegi.  Svo einföld eldamennska og svo bara fullt af grænmeti með.

MIðvikudagur: Ég ætla að færa fimmtudagssúpuna yfir á miðvikudaginn og afgangurinn af lambagúllasinu frá mánudeginum mun breytast í kjötsúpu.  Svo einfalt og þægilegt að nota afganga.   Það má nota flesta afgangsrétti í súpur.  Bara bæta við smá vatni, krafti, kannski flösku af maukuðum tómötum og smá salti og pipar.

Fimmtudagur: Linsubauna curry gefur góða orku sem okkur á eflaust ekki eftir að veita af, alls ekki flókin matseld.

Föstudagur:  Mig grunar að við eigum eftir að verða þreytt þennan föstudaginn og stefnan því sett á kjúklingatortillur.

Laugardagur:

Í frystinum leynist eitt lambalæri sem verður tilvalið að kippa út fyrir helgina.  Lambalæri í ofninn, kartöflur á grillið (ef það verður ekki stórhríð), gott salat og sósa.  Einfalt og gott.

Sunnudagur:

Spurning um að gera aðra tilraun til að elda girnilega hnetusmjörskjúklingaréttinn sem ég ætlaði að elda í síðustu viku en náði ekki.  Hann lítur svo hrikalega girnilega út 🙂  Það fer svona eftir stöðunni, kannski verður bara grjónagrautur 😉

Ég veit að sjúklingurinn má ekki borða neitt heitt og verður sennilega bara á einhverju algeru sérfæði alla vikuna.  Skilst að ís og hristingar séu svona það besta, en ef einhver er með góðar hugmyndir og reynslu af mat sem er kaldur og mjúkur (ekki mjólkurvörur samt) þá væri mjög gott að fá fleiri hugmyndir frá ykkur 🙂

Á innkaupalistanum fyrir þessa viku mun vera mikið af hlutum til að búa til ís og næringarríka hristinga (gott fyrir kroppinn en ekki gott fyrir budduna):

• Hrein kókosmjólk
• Kasjúhnetur
• Bananar
• Avakadó
• kókosvatn
• kókosolía

Auðvitað ávextir og grænmeti fyrir hina skólastelpuna og okkur hin:

• Epli
• Appelsínur
• gulrætur
• gúrkur

Sem betur fer er nóg til af chia fræjum, möndlum, möndlusmjöri, frosnum ávöxtum (síðan í síðustu viku) spínati og fleiru fyrir morgunverðinn.

Ég sé fyrir mér að búa til eitthvað gott kínóa salat í byrjun vikunnar sem dugar í hádegismat fyrir mig í nokkra daga.

• Kínóa
• pekan hnetur
• perur
• fetaostur
• kál
• rauð paprika

Til að standast áskorunina ætla ég að taka pening út úr hraðbanka en ekki nota debetkortið þannig að ég fari ekki yfir 25.000 kallinn (helst minna þar sem hinar tvær vikurnar voru yfir takmarkinu)

Gaman að heyra hvað margir hafa ákveðið að taka þetta í gegn hjá sér líka og skemmtilegt að heyra frá ykkur bæði í skilaboðum, á blogginu og facebook.

Gangi okkur öllum rosalega vel þessa þriðju viku 😉

Vika tvö… þessi vika verður fljót að líða, hér á bæ eru börnin alveg að missa sig úr spenningi yfir því að vera á leið í leikhúsið á laugardaginn að horfa á Línu Langsokk, við skulum vona að vikan verði fljót að líða 😉

Mánudagur:  Grænmetisrétturinn að þessu sinni verður grænmeti, núðlur og hnetusósa.  Ég er með algert æði fyrir kelp núðlum en það versta er að þær fást ekki allstaðar og í hverfisbúðinni minni hafa þær hreinlega ekki verið til í nokkrar vikur, svo ég gæti þurft að reyna í öðrum búðum.

Þriðjudagur:  Ætli það verði ekki bara eggjabrauð á þriðjudaginn til að hafa smá fjölbreytni í þessum þriðjudags eggja máltíðum.  Börnin elska eggjabrauð og ég sker niður grænmeti í lengjum til að borða með.  Ég fæ mér oftast bara egg, sleppi brauðinu og bæti það upp með fullt af grænmeti.  Á þriðjudögum er oftast lítill tími í eldamennsku og allir búnir að borða heitan hádegismat svo ég held að það skaði engan á borða stundum svona einfalt á kvöldin.

Miðvikudagur: Linsubaunabolognese með spelt spaghettí.  Við erum 4 sem finnst þessi réttur alveg svakalega góður en ein segir alltaf  “Ohhhhhhh, af hverju notaðirðu ekki KJÖÖÖÖÖT” (með áherslu)!  Þar sem linsubaunirnar eru svo margfalt ódýrari en kjöt leyfi ég mér stundum að kaupa með þessu ferska basilíku og Piccolo tómata (sem við ELSKUM, hvernig er hægt að rækta svona góða tómata, ég bara spyr ???  )!

Fimmtudagur: Karrý-kókos grænmetissúpa/ kjúklingasúpa og fiskisúpa eru alltaf mjög vinsælar.  Ætla að gera fiskisúpu í þetta skiptið því það er svo langt síðan ég hef haft fisk.

Föstudagur:  Ég sá að það er er grjónagrautur hjá stelpunum mínum í hádeginu á föstudaginn svo ég er því að spá í því að gefa pizzunni frí þennan föstudaginn og skella í smá gúllas.  Eitthvað sem má setja í pott með grænmeti og láta malla á meðan ég geri helgar tiltektina.  Ég er ekki með neina uppskrift á vefnum en það er ein góð í uppskriftaheftinu sem ég skal setja hérna inn fyrir lok vikunnar.

Laugardagur:  Það verður stuð á laugardaginn,  Lína í leikhúsinu og svo má ekki gleyma úrslitunum í Söngvakeppni sjónvarpsins.  Maturinn á laugardaginn er ekki komin á hreint ennþá en það verður alveg örugglega eitthvað voða gott.

Spurning að skella í tíramísú eftirrétt

Sunnudagur:  Mig langar að prófa nýjan rétt í þessari viku, hér er einn sem ég er búin að hafa augastað á lengi en aldrei eldað.  Það eru mörg matarblogg sem ég fylgist með og hef gaman af að prófa hitt og þetta, eitt af þeim er gulur rauður grænn og salt.  Miðað við lýsingarnar fæ ég bara strax vatn í munninn og hlakka til á sunnudaginn 🙂

Það er ekki víst að þetta gangi upp til að standast áskorunina og gæti þurft að endurskoða helgina eitthvað.

En við sjáum til, nú er bara að bretta upp ermarnar og búa til eitthvað úr því sem er til í skápunum heima.  Eiga ekki allir svona skápa og skúffur sem innihalda eitthvað sem fer að nálgast endalaokadagsetningu og bíður bara eftir því að vera notað?

Eftir vinnu í dag ætla ég að bretta upp ermarnar og baka hrökkbrauð og búa til Snickersköku svona til að eiga eitthvað gott í frystinum, þannig get ég sussað á allar langanir þegar ég fer í búð og hugsað bara “þú átt snicerksköku í frystinum” og þá kem ég í veg fyrir að það detti ótrúlega girnilegt lífrænt súkkulaðistykki eða eitthvað svona biscotti úr Hagkaup ofan í körfuna 😉