Category: Bakstur

Súkkulaði Brownie (úr grænmeti og ávöxtum)

Þessi kaka er svo holl að það er alveg geggjað.  Hún er auðvitað ekki alveg eins og alvöru brownie sem er búin til úr fullt af sykri, smjöri og súkkulaði.  Þessi er aðallega úr grænmeti og ávöxtum og það er það sem er svo geggjað 🙂  Þvílík sæla að gefa krökkunum súkkulaðiköku sem er full af næringu og hún passaði líka alveg einstaklega vel með kaffinu mínu.  Ég gerði þau mistök að segja eiginmanninum hvað væri í henni áður en hann smakkaði svo hann var heldur betur með varan á sér en þegar hann fékkst til að smakka kom hún honum verulega á óvart (ég veit ekki alveg við hverju hann bjóst hehe).  Þegar önnur skvísan mín smakkaði hana sagði hún eftir fyrsta bitann „mamma, viltu baka þessa aftur“.  Mjög góð meðmæli það.

Þessi kaka hentar mjög vel fyrir ofnæmispésa þar sem hún er glúteinlaus, eggjalaus og mjólkurlaus.

Holl súkkulaði brownie

Hráefni:

1 og 1/2 bolli glúteinlaust mjöl (möndlumjöl, bókhveiti eða all purpose baking flour) (eða bara spelt)
4 tsk vínsteinslyftiduft
3 bollar döðlur
1 bolli eplamús (ég átti ekki svoleiðis svo ég gufusauð 2 epli og maukaði svo með töfrasprota)
1 bolli rifin kúrbítur (1 meðalstór)
1 bolli rifnar gulrætur (ca 3 meðalstórar)
2 þroskaðir bananar
6 msk kakó
2 tsk vanilla
1/2 tsk salt (himalayjasalt eða sjávarsalt)

Aðferð:

Hitið ofnin á 175°C
Leggið döðlur í bleyti
Rífið niður kúrbít og gulrætur
Blandið saman mjöli, salti, kakói og lyftidufti í skál
Ef þið eigið ekki eplamús, afhýðið þá epli og setjið í pott með smá vatni (helst ofan á gufusigti) og sjóðið í nokkrar mínútur.
Setjið saman í matvinnsluvél: döðlur, banana, eplamús/gufusoðnu eplin og vanillu.  Blandið því næst kúrbít og gulrótum saman við og að lokum þurrefnunum saman við.
Setjið í kökumót, ég notaði ofnskúffuna og það passaði vel.
Bakið í ca 40 mín en fylgist vel með því ofnar eru misjafnir.

holl súkkulaði brownieKúrbítur og gulrætur

Holl súkkulaðibrownieHoll súkkulaðibrownie

Ég bræddi 70 % súkkulaði yfir nokkra bita á laugardeginum og það gerði mjög mikið fyrir hana.  Afgangurinn var síðan borðaður eftir skóla á mánudegi og það kom ekkert að sök þó að það væri ekki súkkulaði á henni, það var pínu kvartað en engu að síður rann allt mjög ljúflega niður.

Holl súkkulaðibrownie

Verði ykkur að góðu og ég skora á ykkur að prufa 🙂

heilsumamman14 Comments

Heimagerðar tortillur

Ég elska tortillur.  Fyrir utan þetta klassíska mexíkóska er hægt að setja afganga af allskonar mat inn í tortillu ásamt sallati og einhverri góðri sósu og það er komin þessi dýrindis máltíð.  Þær eru líka eitt af því vinsælasta í skólanestið.

Það er mjög einfalt að baka sjálfur tortillurnar og þegar maður byrjar þá er eiginlega ekki hægt að fara aftur tilbaka.  Ég hvet ykkur eindregið til að prufa.  Það er viðbúið að kannski taki það lengri tíma í fyrsta skiptið en svo verður þetta mjög fljótlegt.  Þetta er að taka hjá mér ca 15-20 mín en yfirleitt er ég að gera eitthvað annað á sama tíma (t.d. steikja kjúkling, hakk eða grænmeti) svo ég þarf hvort sem er að standa við eldavélina.

Hráefni: (6-7 tortillur)

  • 2 bollar Spelt, fínt og gróft til helminga
  • 2 tsk vínsteinslyftiduft
  • 2-3 msk olía
  • Kryddið eftir smekk (t.d. salt, pipar, oregano og paprika)
  • 1/2 bolli af vatni

Aðferð:

Setjið spelt, lyftiduft og krydd í skál.  Bætið í olíu og vatni (ekki of heitt og ekki ískalt, annað hvort volgt eða við stofuhita).  Hnoðið deigið í höndunum og skiptið niður í svipaðar kúlur (ca 6-7).  Fletjið út og steikið á pönnu.  Ég hef notað titanium pönnu sem festist ekki við svo eg þarf ekki að setja neitt á pönnuna.  Fylgist vel með svo hún brenni ekki og snúið henni við.

Tortillur

Þegar þið eruð búin að baka tortilluna setjið þið hana á disk og rakt viskastykki yfir (mjög mjög mjög mjög mikilvægt) því þannig haldast þær mjúkar á meðan klárað er að baka í rólegheitum.  Ef þetta gleymist þá verða þær fljótt harðar og passa eiginlega bara frekar sem pizzubotn 😉

Það er skemmtilegt að prufa að krydda með mismunandi kryddum og hafa þær mismunandi þykkar.   Stundum bæti ég við sesamfræjum og hef þær í þykkara lagi og nota sem pítubrauð.

tortilla

Skora á ykkur að prufa  🙂

heilsumamman7 Comments

Laaaang besta döðlukakan

Það er vel við hæfi að skella inn góðri kökuuppskrift í dag í þessum kulda og roki.  Ekkert meira kósý en að finna ljúfan kökuilm og kúra sig inni í hlýjunni.  Þessi uppskrift sem ég ætla  að smella inn er af minni uppáhaldsköku síðasta árið.  Ég sá þessa uppskrift fyrir ca ári síðan og hef bakað hana svo oft að ég er löngu búin að missa töluna.  Mjög margir sem hafa fengið sneið hafa beðið um uppskriftina því hún er einfaldlega alveg yndisleg.  Þessi uppskrift kemur af síðunni hennar Ebbu Guðnýjar en þar heitir hún Döðluterta Írisar.

döðlukaka

Hráefni:

1 bolli döðlur (læt þar liggja í bleyti í smástund svo það sé auðveldara að brytja þær niður)
1 bolli möndlur
1 plata 70 % súkkulaði (oft nota ég bara 60-70 gr og nota restina til að skreyta kökuna að ofan)
1/4 bolli pálmasykur eða hrásykur
3 msk spelt (stundum set ég kókosmjöl, hún verður aðeins lausari í sér en MJÖG góð)
1 tsk vanilludropar
3 msk vatn (ég nota yfirleitt vatnið af döðlunum til að fá smá meiri sætu)
2 egg
1 tsk vínsteinslyftiduft

Aðferð:

Öllu hrært saman og látið standa í skálinni í 15 mínútur.  Sett í mót (frekar lítið) og bökuð í 35-45 mín (eftir ofninum) v/ 150 °C

Ég hef bæði sett möndlurnar í matvinnsluvél og unnið þær smátt en í önnur skipti gróf-saxað þær og hvoru tveggja er gott.  Ég hef jafnvel notað möndluhratið af möndlumjólkinni og það kemur bara vel út.

Stundum hef ég bakað kökuna og skorið hana niður í litla bita í staðinn fyrir kex.  Einnig skreytt hana með þeyttum rjóma, jarðaberjum og söxuðu súkkulaði og  farið með í veislur. Ég hef líka brætt súkkulaði yfir hana.  Möguleikarnir eru margir 🙂

Börnin mín og allir vinir þeirra sem hafa fengið sér sneið elska þessa köku.

heilsumamman12 Comments

Sítrónu- kókos morgunverðarkaka

Gerði  þessi stykki nú í vikunni og þvílík dásemd.  Með því að nota glúteinlausa hafra eru þau glúteinlaus, auk þess að vera án viðbætts sykurs og Chia fræin eru ofurfæða og eru sneisafull af kalki, Omega3 ofl.    Ég skal vera hreinskilin, þetta er svona pínu maus uppskrift, sem ég er yfirleitt ekki mjög hrifin af því ég vil helst hræra öllu hráefninu saman í eina skál og hella í mót en ég á pottþétt eftir að gera þessa mjög oft.  Þetta er svona á milli þess að vera kaka og orkubar.  Gaman að gefa krökkunum holla köku um helgina sem er full af næringu, góð orkustykki fyrir þá sem eru í framkvæmdum og geggjað í helgar-morgunmatinn 🙂

Upprunalega uppskriftin er frekar lítil svo ég tvöfaldaði hana og veitti ekki af því hún féll í mjög góðan jarðveg 🙂

Tvöföld uppskrift:

  • 3 msk Chia fræ
  • 6 msk sítrónusafi
  • 2 bollar haframjöl – malað
  • Smá salt
  • 1 tsk vínsteinslyftiduft
  • 1,5 bolli (ca 3,5 dl) Kókosmjöl
  • 4 msk sítrónubörkur
  • 4 msk kókosolía (fljótandi)
  • 4 msk eplamús (ég smellti bara epli í pott og gufusauð í nokkrar mín og stappaði með gaffli)
  • ½ bolli Hunang eða Agave sýróp (má alveg minnka aðeins ef ykkur finnst þetta of mikil sæta)
  • 1 bolli döðlur smátt skornar
  • 4 msk kókosmjöl

Aðferð:

  1. Leggið Chia fræin í bleyti í sítrónusafanum og leyfið þeim að drekka í sig sítrónusafann í ca 15 mín
  2. Ef þið eigið ekki tilbúna eplamús, skrælið þá epli og gufusjóðið í nokkrar mínútur
  3. Malið haframjölið í matvinnsluvél
  4. Saxið döðlurnar smátt
  5. Rífið niður sítrónubörk
  6. Blandið saman haframjölinu,  kókosmjölinu, saltinu og lyftiduftinu.
  7. Blandið saman Chia fræjunum, eplamúsinni, hunangi/sýrópi, kókosolíunni og döðlunum  (smá tips, ef þið gufusuðuð epli þá bráðnar kókosolían þegar þið blandið þessu öllu saman 😉 )
  8. Blandið svo blautu efnunum saman við þurru efnin og blandið þangað til allt er búið að samlagast.
  9. Setjið deigið á bökunarplötu og stráið kókosmjölinu yfir.
  10. Bakið v/ 150°  í 25-28 mín

Njótið 🙂

Sítrónu- kókos morgunverðarkaka

Það er alveg spurning um að gera 2x tvöfalda næst og ná í fulla ofnskúffu. Þá endist skammturinn kannski lengur en í 2 daga 🙂

Sítrónu- kókos morgunverðarkaka

heilsumamman2 Comments

Kínóa pönnukökur

Eins og áður hefur komið fram elska ég Kínóa.  Finnst það bara eitthvað svo fullkomin fæða 🙂  Hér er enn ein hugmyndin hvernig hægt er að bæta Kínóa inn í mataræðið.  Það er að baka Amerískar pönnukökur og setja soðið Kínóa saman við.  Við það verða pönnukökurnar ennþá matarmeiri, næringarríkari og próteinríkari.  En það er algert frumskilyrði að grjónin hafi verið látin liggja í bleyti áður en þau voru soðin og skoluð vel svo grjónin séu ekki römm.  Það er góð hugmynd að baka stóran skammt og eiga inni í ísskáp eða frysti (og setja í brauðristina) handa litlum munnum.  Þessi hugmynd vaknaði þegar fjölskyldan borðaði kvöldmatinn mjög snemma og fór svo sund.  Þegar heim var komið voru allir svo svangir eftir sundið og eitthvað lítil til í kotinu.   Ég var fyrst pínu feimin við að setja mikið magn af grjónum út í en blandaði alltaf meira og meira þangað til öll grjónin voru komin út í deigið.  Kom skemmtilega á óvart hversu ljúffengt þetta var.  Eftir þetta hafa Kínóapönnukökur verið reglulega á borðum.

Hér kemur tvöföld uppskrift, enda dugir ekkert minna fyrir 5 manna fjölskyldu 🙂

Hráefni:

  • 5 dl spelt (fínt/ gróft)
  • 2 msk lyftiduft
  • 0,5 tsk salt
  • 2-3 msk hlynsýróp eða döðlumauk
  • 2 egg
  • 4 msk kókosolía/ smjör
  • 5-6 dl vökvi (vatn, mjólk, rísmjólk, möndlumjólk, kókosmjólk)
  • 2 tsk vanilludropar
  • 2-4 dl soðið kínóa

Aðferð:

  1. Blandið saman þurrefnum í skál.
  2. Í aðra fara egg, olían, sykurinn, vanilludroparnir og hluti af vökanum.
  3. Blandið vel saman með písk þangað til blandan er orðin slétt.
  4. Blandið svo rólega saman við þurru efnin og hrærið rólega.
  5. Bætið svo kínóa saman við og restinni af vökvanum.

Deigið á að vera frekar þykkt, ef ykkur finnst pönnukökurnar allt of þykkar og lengi að bakast þá bætið þið bara meira vökva saman við.

Hitið viðloðunarfría pönnu og hafið hana meðal heita.  Hellið deigi á pönnuna og bíðið þangað til „loftbólurnar“ hætta þá er komin tími til að snúa við.  Bakið í 20-40 sek á hinni hliðinni og þá ætti pönnukakan að vera klár.

amerískar pönnukökur

Það er mjög gaman að leika sér með amerískar pönnukökur, ég set oft einhverja hollustu út í þegar ég baka þær.  T.d. Chia fræ, Lucuma duft eða Hveitikím.  Það er hægt að setja hvað sem er ofan á, t.d. smjör, ost, sultu, hnétusmjör, möndlusmjör en á sunnudagsmorgnum þá er skylda að fá sér íslenskt smjör og ekta hlynsýróp 😉  Það er frábært að eiga þessar inni í skáp og grípa í eina og eina t.d. eftir skóla eða í kvöldkaffi 🙂

heilsumamman2 Comments