Category: Bakstur

Súkkulaði- kúrbítsmúffur

Yndislega góðar múffur, ekki brjálæðislega sykursætar og voru bakaðar fyrir Brunch á sunnudagsmorgni.  Pössuðu  mjög vel þannig.  Reyndar tókst mér að baka fyrri plötuna alltof lengi svo gestirnir fengu brenndu kökurnar en við gæddum okkur á hinum mjúku þegar þeir voru farnir.  Kannski spurning um að tala minna næst og fylgjast betur með ofninum 😉

IMG_3805

Hráefni:

  • 3 egg
  • 1/2 bolli sykur
  • 1/2 bolli olía
  • 2 tsk vanilludropar
  • 2 meðalstórir kúrbítar
  • 1/2 bolli pecan hnetur (eða valhnetur)
  • 100 gr 70 % súkkulaði
  • 1 msk appelsínubörkur
  • 3 bolli spelt (fínt og gróft til helminga)
  • 2 tsk vínsteinslyftiduft
  • 1 tsk salt (himalayja eða sjávar)
  • 1 tsk kanill

Aðferð:

  1. Blandið saman eggjum, sykri, olíu og vanilludropum þangað til létt.
  2. Blandið öllum þurrefnunum saman.
  3. Rífið kúrbítinn niður, saxið hneturnar og súkkulaðið og blandið saman við þurrefnin.
  4. Blandið öllu mjög varlega saman
  5. Setjið í muffinsbökunarplötu eða sílíkonmót og bakið við 200°c í 20 – 22 mín

Það passar kannski ekki að setja inn uppskrift af kúrbíts múffum þegar kúrbíturinn er að detta úr „season“ því hann er orðin dýrari núna ásamt því að líta ekki eins vel út og hann gerði fyrir nokkrum vikum.  En hver veit nema þið fáið kúrbít á góðu verði og þá vitið þið sko hvað skal gera 😉

Verði  ykkur að góðu 🙂

heilsumamman1 Comment

Bananamúffur með súkkulaðibitum

Þetta er muffinsuppskrift númer 1 á þessu heimili.  Ég veit ekki hversu oft ég hef bakað þessar kökur, ætli skiptin gætu ekki verið orðin 100.  Í hvert skipti sem er krakkapartý, mjög oft fyrir ferðalög og sumarbústaðarferðir.  Og svo skelli ég oft í uppskrift þegar ég fæ ódýra banana og á í frysti. Finnst æðislegt að geta gripið til ef stelpurnar fá gesti eftir skóla og leikskóla og manninum mínum finnst æði að geta gripið með sér nokkrar í nesti í vinnuna.

IMG_2925

Hráefni:

  • 4 bananar (vel þroskaðir)
  • 2 egg
  • 85 g hrásykur
  • 50 ml olía  (ég nota yfirleitt vínberjakjarnaolíu eða lífræna sólblómaolíu)
  • 250 gr spelt (fínt og gróft til helminga)
  • 1,5 tsk vínsteinslyftiduft
  • 1/4 tsk salt
  • 1 tsk vanilludropar
  •  75 g dökkt súkkulaði (í bitum)

Aðferð:

  1. Bananarnir skornir í bita og stappaðir eða settir í matvinnsluvél og maukaðir.
  2. Olíu, sykri, eggjum og vanilludropum bætt hrært saman við.
  3. Spelti, lyftidufti og salti bætt rólega saman við.
  4. Blandið súkkulaðinu rólega saman við.
  5. Ef deigið er of þykkt má setja nokkra dropa af mjólk saman við.
  6. Setjið í muffinsform og bakið við 200°C í 20 mín.

IMG_2927

Ég keypti um daginn voða sæt lítil muffinsform í Sostrenes grene, voru alls ekki dýr og þau eru svo dúlluleg.  Hér að neðan sést hversu lítil þau eru, kökurnar til hægri eru venjuleg stærð.  Þetta vakti mikla lukku hjá yngstu kynslóðinni enda miklu skemmtilegra að geta fengið sér 2 í stað þess að fá 1, eða 4 í staðinn fyrir 2  🙂

IMG_2930

Þessi uppskrift kemur úr bókinni hennar Nönnu, þessari stóru gulu og rauðu (sem ég nota bene elska).  Nema ég er búin að breyta uppskriftinni smá,  ég er búin að minnka olíuna um helming (aðallega til að spara því ég er með fína olíu og tími bara litlu í einu) og minnka sykurinn um helming.  Og nota spelti í stað hveitis.  Það þýðir að kökurnar verða þéttari og matarmeiri en ekki eins léttar og fluffy.  Það hefur þó ekki komið að sök og alltaf sívinsælar.  Þær endast hinsvegar ekki eins lengi mjúkar svo best er að geyma þær í frysti og taka út eftir þörfum.

Verði ykkur að góðu og góða helgi 🙂

heilsumamman4 Comments

Rjómabollur með kókosrjóma

Þeir sem eru með mjólkuróþol eða borða ekki mjólkurvörur þurfa ekki að andvarpa yfir rjómabollunum.  Það er t.d. hægt að gera kasjúhneturjóma, möndlurjóma eða kókosrjóma.

IMG_3757

Ég bakaði nokkrar bollur í gær og setti í þær kókosrjóma.  Ég gerði 3 tegundir: vanillu, jarðaberja og súkkulaði.  Mjólkuróþolsskvísan var í sjöunda himni og pabbanum á heimilinu fannst kókosrjóminn meira að segja betri en sá venjulegi.

Hérna er uppskrift sem ég birti um daginn af kókosrjóma og þið getið kíkt á, þar eru fleiri myndir.

Grunnur:

  • 1 dós kókosmjólk,
  • 2 msk hlynsýróp/ eða önnur sæta t.d. akasíuhunang eða agavesýróp

Aðferð:

  1. Setjið dósina í frysti í ca 30 mín og notið svo hlutann sem hefur „harðnað“
  2. Þeytið saman ásamt hlynsýrópi eða annari sætu

Ég skipti þessu í 3 hluta og bætti eftirfarandi í:

Vanillurjómi: 1 tsk vanilludropar (mér finnst bestir úr heilsubúðum, með alvöru vanillubragði)

Jarðaberjarjómi:  2 tsk sykurlaus jarðaberjasulta

Súkkulaðirjómi: 2 tsk kakó, 1/2 tsk vanilludropar og 1 tsk hlynsýróp

Þegar búið er að hræra saman við bragðefninu þarf sennilega að skella rjómanum aftur í frysti í smástund áður en hann er settur á bollurnar.  Ég þurfti þess allavegna en reyndar var búið að hræra mjög mikið því allir voru svo spenntir yfir þessu og tilbúnir til að hjálpa til.

IMG_3750            IMG_3752

 

 

 

 

Súkkulaðirjóminn lítur nú reyndar pínu furðulega út á þessari mynd en um daginn bjó ég til súkkulaðirjóma og notaði á vöfflur og mmmmmm þvílík dásemd 🙂  Leyfi þeirri mynd að fljóta með þar sem hún sýnir súkkulaðirjómann í réttu ljósi.

IMG_3549

Bollurnar:

Ég keypti nokkrar bollur á föstudaginn og ætlaði að láta þær duga, 6 stk. handa fjölskyldunni þar sem ég get ekki sagt að ég hafi kunnað mér hóf í bolluáti síðustu áratugi og rjómabollur eitt það besta sem ég kemst í.  Þetta er annað árið sem bolludagurinn kemur aftan að mér, yfirleitt var ég búin að skoða dagatalið  og hlakka til í margar vikur.

En þar sem bollurnar sem ég keypti voru á bragðið eins og gamall skór, þrátt fyrir fögur loforð á pakkningunni bretti ég upp ermarnar í gærkvöldi og bakaði spelt-vatnsdeigsbollur.  Ég notaði uppskrift sem Inga næringarþerapisti gaf upp á Fésbókinni og þær heppnuðust svona vel. Hér kemur uppskriftin frá henni:

Hráefni:

  • 2 dl. vatn
  • 1 ½ matsk. extra virgin ólífuolía eða bragðlaus kókosolía
  • 100 gr. fínt (sigtað) spelt
  • 2 stór egg (3 lítil)

Aðferð:

  1. Sjóðið saman í potti, vatn og olíu.
  2. Takið pottinn af hitanum og hrærið speltinu út í (hrærið kröftuglega).
  3. Setjið pottinn aftur yfir hitann og hrærið deigið saman þar til það hefur fengið mjúka áferð.
  4. Kælið pottinn með deiginu í (t.d. í vatnsbaði).
  5. Hrærið eggin saman og bætið þeim smám saman út í kalt deigið og hrærið á meðan með handþeytara.
  6. Hrærið deigið vel eftir að eggjunum hefur verið bætt útí.
  7. Hitið ofninn í 200°.
  8. Setjið bökunarpappír á plötu, búið til ca 9 bollur úr deiginu og bakið í miðjum ofni.
  9. Opnið ekki ofnhurðina fyrstu 20 mín.
  10. Bakist í 30 mín. við 200°

Mínar voru pínu blautar að innan svo ég skar þær í tvennt, raðaði með sárið upp og bakaði í 5 mín í viðbót.

Að lokum:

Það skiptir máli hvernig kókosmjólk er keypt, ekki kaupa lite (þar sem það er bara búið að bæta meira vatni út í hana) og kaupið dós þar sem stendur hvað sé hlutfallslega mikið af kókoskjöti, ég hef reynt að frysta kókosmjólk þar sem stendur aðeins: coconutmilk and water (engin  hlutföll) og þá bara gerðist ekki neitt, engin rjómi úr þeirri dós !

Verði ykkur að góðu og njótið dagsins 🙂

heilsumammanLeave a comment

Ódýr og einföld súkkulaðikaka

Þemað núna í janúar er ódýrt þar sem flestir hafa sennilega eytt vel í mat í síðasta mánuði.  Þessi kaka er ótrúlega einföld, góð og ódýr.  Ég fékk uppskriftina hjá vinkonu minni en er búin að minnka aðeins sykurinn og nota spelt í stað þess að nota hvítt hveiti.  Virkilega góð sunnudagskaka.

 IMG_3563

Hráefni:

  • 2 egg
  • 1,5 dl hrásykur
  • 0,75 dl olía (ég nota oftast kókosolíu, vínberjakjarnaolíu í dökkri flösku eða lífræna sólblómaolíu)
  • 1 tsk vanilludropar
  • 1 dl kakó
  • 2 dl sterkt kaffi (líka gott að setja heitt vatn eða mjólk)
  • 3,5 dl spelt (fínt og gróft til helminga)
  • 3/4 tsk salt
  • 2 tsk vínsteinslyftiduft

Aðferð:

  1. Þeytið saman egg, sykur og vanillu og bætið svo olíunni saman við.
  2. Blandið saman kakói og vökva.
  3. Hellið kakóblöndunni út í eggjablönduna.
  4. Blandið saman spelt, salti og lyftidufti og hrærið samann við kakóblönduna.
  5. Setjið í lausbotna form 26 cm (best að fóðra með bökunarpappír) og baka í 20-25 mín við 200°C

Ofan á finnst mér best að leggja plötu af 70 % súkkulaði og leyfa henni að bráðna á heitri kökunni og slétta svo úr.  Set yfirleitt smá af kókosolíu  (1 tsk – 1 msk) svo kremið verði ekki grjóthart og brotni í allar áttir þegar kakan er skorin.

IMG_3570

Það er sérstaklega gott að gera þessa köku með sterku expresso kaffi en kannski betra að nota vatn eða mjólk (möndlu, rís, hafra, eða venjulega) ef kakan er bökuð fyrir lítil börn. 

Verði ykkur að góðu 🙂

heilsumammanLeave a comment

Piparkökumúffur (Kryddbrauð)

Þessi uppskrift varð til í síðustu viku.  Hún gæti líka heitið „Glúteinlaust kryddbrauð úr grautarafgang“, en mér fannst það ekki alveg nógu rómó.  Þegar maður eldar hafragraut úr glúteinlausum höfrum/ eða almennt glúteinlausa morgungrauta sem kosta 1000 kr/ kg, þá tímir maður ekki að henda afganginum í ruslið.  Yfirleitt set ég hann inn í ísskáp og reyni að nota í bollur, pönnukökur eða annan bakstur en það tekst ekki alltaf.  En nú er ég búin að leysa málið, Kryddbrauð sem gengur undir nafninu piparkökumuffins er búið að gera allt vitlaust á heiminu í síðustu viku og búið að baka  það 3 sinnum.

Piparkökumuffins

Hráefni:

  • 3 dl mjöl (annaðhvort glúteinlaust eða bara spelt ef þær þurfa ekki að vera glúteinlausar)
  • 1,5 dl sykur (eða 2 dl af döðlumauki)
  • 2 msk sykurrófusýróp (fæst í heilsubúð) eða bara Agave, hlynsýróp eða hunang
  • 3 dl afgangur af hafragraut eða öðrum morgungraut
  • 1,5 dl haframjöl (glúteinlaust ef þær eiga að vera glúteinlausar)
  • 1,5 dl mjólk (hafra, möndlu, rís, lífræn eða bara kusu)
  • 1 tsk engifer
  • 1 tsk negull
  • 2 tsk kakó
  • 3 tsk vínsteinslyftiduft
  • 2 tsk kanill
  • 0,5 tsk salt

Öllu hrært saman og sett í muffins bökunarplötu. Bakað við 180°c í 25-30 mín (ég er komin niður á það að minn ofn bakar þær á nákvæmlega 28 mín)

Þessar múffur eru svo dásamlegar, tekur ekki meira en 5-10 mín að hræra saman, eru ódýrar og svo lyktin sem kemur í húsið, maður minn, hún er svo dásamleg að ég vildi að ég gæti tappað henni á flöskur.  Það er eiginlega sama lyktin og þegar maður bakar piparkökur nema þetta er svona „aðeins“ fljótlegra.

Uppskriftin gefur 24 stk.

Verði ykkur að góðu 🙂

heilsumammanLeave a comment

Geggjaðar gulrótarmúffur (glúteinlausar)

Það eru gulrætur út um allt núna og hægt að fá þær á góðu verði og þessvegna tilvalið að skella í þessar dásamlegu gulrótarmúffur.  Það er engin viðbættur sykur í þeim (bara smá hunang og döðlur) svo þetta er fínasta hversdags-sætabrauð.  Mér finnst yndislegt að eiga eitthvað svona gotterý sem hægt er að gæða sér á með kaffibollanum eða teinu meðan stormurinn blæs úti.  Ekkert samviskubit bara eintóm hollusta og gleði.  Skólastelpan mín er líka mjög sátt við að fá svona þegar hún kemur heim úr skólanum.

Hráefni:

  • 3 bollar möndlumjöl eða spelt (eftir því hvort þær eigi að vera glúteinlausar eða ekki)
  • 1 tsk salt
  • 2 tsk vínsteinslyftiduft
  • 2 tsk kanill
  • 5 egg
  • 1/2 bolli hunang
  • 1/4 – 1/2 bolli olía  (má nota eplamauk í staðinn)
  • ca 500 gr gulrætur
  • 1 bolli valhnetur eða pecan hnetur (smátt saxaðar)
  • 1 bolli döðlur (smátt saxaðar) eða rúsínur

Aðferð:

  • Blandið saman öllum þurrefnunum
  • Hrærðið saman egg, hunang og olíu
  • Rífið niður gulræturnar og brytjið niður hnetur og döðlur
  • Blandið saman þurrefnum og blautu efnunum og að lokum gulrótunum, hnetunum og döðlum.
  • Þegar ég hef bakað þær í muffins bökunarplötu voru þær frekar stórar og þá fékk ég 23 stk úr uppskriftinni en annars í kringum 50 stk. ef ég hef bakað þær í venjulegum mótum.
  • Bakið við 180° í 25 -30 mín.

Ég hef bæði bakað þær glúteinlausar og eins bara úr spelti.  Það er bæði gott.  Auðvitað eru þær mýkri með speltinu en sem glúteinlausar eru þær alveg snilld.  Við erum að gera prufu að hafa 100 % glúteinlaust fæði hjá stelpunni okkar núna (sem er alveg heilmikil áskorun þegar maður er 6 ára) og þessar slógu algerlega í gegn.  Það er bara verst hvað allt svona klárast fljótt 🙂

heilsumamman7 Comments