Category: Bakstur

Sykurlaus eplakaka

Ég fékk alveg óstjórnlega löngun í eplaköku í vikunni, bara einn daginn gat ég ekki hugsað um neitt annað.  Kannski voru þetta viðbrögð við sykurlausu dögunum sem eru búnir að vera undanfarið.  En mig langaði ekkert í nammi eða sætindi, bara eplaköku.  Ef ég lokaði augunum sá ég hana fyrir mér fulla af eplum, hnetum, helst kókos og einhverju fleira gúmmilaði.  Eftir 3 daga lét ég það eftir mér, enda lítið mál að búa til holla og góða eplaköku með litlum eða engum sykri.

Eftir nokkra leit endaði ég á uppskrift á pjatt.is sem lofaði góðu, ég breytti henni örlítið, notaði stevíu í stað hunangs, notaði aðeins meira af eplum og bætti við nokkrum döðlum.

eplakaka

Hér kemur uppskriftin eins og ég gerði hana:

Hráefni:

  • 4 epli
  • 1 dl brædd kókosolía (má auðvitað alveg nota smjör)
  • 30 dropar stevía, notaði Via Health með kókos
  • 4 egg
  • 2,5 dl möndlumjöl
  • 3 msk kókoshveiti
  • 1 tsk kanill
  • 2 tsk vínsteinslyftiduft
  • 1/2 tsk salt
  • 1 dl pecan hnetur
  • 7-8 döðlur, smátt brytjaðar

Aðferð:

  1. Hrærði öllu blautu efnunum saman.
  2. Bætið við mjöli, lyftidufti og salti og  hrærið þangað til kekkjalaust.
  3. Hellið deginu í mót og eplunum yfir og blandið lauslega saman.
  4. Bakið í 40 mín við 180 °c
  5. Þegar 5-10 mín eru eftir af tímanum setti ég pekanhneturnar og döðlurnar yfir kökuna.

Sælkeraútgáfa:

  • 5 msk smjör / kókosolía
  • 5 msk hlynsýróp
  • 5 msk rjómi / kókosmjólk
  1. Setjið allt saman í pott og látið malla í smástund þangað til sósan er þykk og svolítið seig.
  2. Hellið karamellusósunni yfir kökuna þegar hún kemur út úr ofninum.

Krakkarnir voru svo hrifin af þessari köku og kláruðu hana upp til agna, meira að segja sú elsta sem segist „hata'“ eplakökur borðaði með bestu lyst 🙂

Með kökunni gerði ég kanil-kókos-rjóma:

Kanil-kókos-rjómi

  • 1 stór dós kókosmjólk
  • 1 tsk kanill
  • 1/2 tsk vanilluduft
  • 7-10 dropar stevía

Aðferð:

  1. Setjið kókosmjólkina inn í frysti í ca. 30 mín
  2. Opnið hana, tekið þykka hlutann og þeytið en vatnið sem verður eftir setjið þið í krukku, inn í ísskáp og notið í næstsa heilsudrykk.
  3. Bætið sætunni og kanilnum út í og bragðbætið enn frekar eftir smekk.
  4. Geymið í kæli þangað til þið berið fram.

Verði ykkur að góðu og góða helgi

heilsumamman5 Comments

Súkkulaðikaka með karamellusósu og pecan hnetum

Jæja, er ekki komin tími á nýja uppskrift?  Einu uppskriftirnar sem birtast núna eru bakstur og sætindi, ástæðan er jú auðvitað sú að ég er búin að vera að stússast í nammi námskeiði undanfarið ásamt því að útbúa hefti stútfullt af nammi og baksturshugmyndum í hollari kantinum.

Hér kemur ein uppskrift úr heftinu, þessi kaka er í miklu uppáhaldi hjá fjölskyldunni.  Hún er svona frekar djúsí… einn sunnudaginn var alveg gersamlega brjálað veður, allir inni og öllum langaði í eitthvað hrikalega gott.  Ég lét til leiðast og bakaði þessa djúsí köku. Fyrirmyndin er kaka sem ég bakaði stundum á árum áður, þá var hún alveg rosalega sæt, stútfull af sykri, en hér er svona heldur betri útgáfa.

sukkuladikakagluteinlausmedkaramellu

Hráefni:

  • 6 dl möndlumjöl
  • 1 dl kakó
  • 2 tsk vínsteinslyftiduft
  • örlítið salt
  • 0,75 dl kókosolía
  • 3 egg
  • 1 dl hrásykur
  • 25 dropar stevía (var með Orginal frá Via Health)
  • 1 -1,5 dl valhnetur
  • 50 g 70 % súkkulaði
  • Karamellusósan:
  • 1/2 dl kókosolía/smjör
  • 1/2 dl hlynsýróp/kókospálmasykur
  • 1 dl  kókosmjólk/rjómi
  • 0,5 tsk vanilluduft

Aðferð: setjið allt í pott nema vanilluduftið og hrærið mjög vel í nokkrar mín þangað til karamellan lítur vel út, bætið vanilliuduftinu að lokum út í.

  • Ofan á:
  • 1 dl af smátt söxuðum pecan hnetum
  • 50 gr 70 % súkkulaði

Aðferð:

  1. Blandið saman þurrefnunum.
  2. Bræðið kókosolíuna við lágan hita eða í vatnsbaði.
  3. Hrærið saman eggjum, sykri, stevíu og kókosolíu.
  4. Blandið þurru og blautu efnunum saman.
  5. Bætið hnetum og súkkulaði saman við.
  6. Bakið víð 200° í ca 20 mín. (ath. fer eftir ofninum, ekki baka hana of lengi svo hún verði þurr og hörð)
  7. Þegar nokkrar mínútur eru eftir af bökunartímanum hellið þið karamellunni yfir ásamt pecan hnetunum.
  8. Þegar kakan er tekin út er söxuðu súkkulaði hellt yfir og látið bráðna.

heilsumamman1 Comment

Smákökusamkeppni og uppáhalds smákökuuppskriftin

Á dögunum efndu Heilsuréttir fjölskyldunnar og Bókafélagið til uppskriftasamkeppni og leituðu að bestu hollu smákökunni.   Ég hef aldrei tekið þátt í neinni svona keppni en að þessu sinni langaði mig að vera með 🙂

Það var ekkert leiðinlegt að lenda í þriðja sæti og fá þessi flottu verðlaun 🙂

verðlaun

Uppskriftin sem ég fékk verðlaun fyrir er búin að vera í uppáhaldi í mörg ár.  Fyrirmyndin kemur úr uppskriftarbók sem var til heima og ég féll fyrir þeim kökum fyrir uþb. 20 árum síðan, bara unglingur.  Heima voru 4 bræður sem var mjög gaman að baka fyrir og þessar kökur mæltust alltaf sérstaklega vel fyrir hjá þeim, við skulum segja að það hafi lítið reynt á geymsluþolið 😉   En eftir að hafa verið í reglulegri tilraunastarfsemi síðustu 2 árin er komin töluvert hollari útgáfa af þessum yndislegu kökum.

Verði ykkur að góðu 🙂

Hafrakókoskaka með súkkulaði

Hér kemur þessi dásemdar uppskrift:

Hráefni:

  • 100 g kókosolía
  • 3 dl haframjöl
  • 1 1/2 dl kókosmjöl
  • 1/2 dl hrásykur (hér má nota kókospálmasykur en þær verða töluvert dekkri útlits)
  • 10 dropar stevia (Original frá Via Health)
  • 1 egg
  • 2 tsk vínsteinslyftiduft
  • 1 msk gróft spelt
  • 100 g 70 % súkkulaði

Aðferð:

  1. Bræðið kókosolíu við vægan  hita.
  2. Blandið öllu hráefninu saman og hellið kókosolíunni yfir.
  3. Blandið öllu vel saman og setjið deig á plötu með teskeið.
  4. Bakið við 190°c í 8 mín (ath. ekki blástur) Þær eru mjúkar þegar þær koma úr ofninum en harðna þegar þær kólna.
  5. Þegar kökurnar hafa kólnað penslið þið bræddu súkkulaði undir botninn.
  6. Best að geyma þessar kökur í frysti og eru langbestar beint úr frystinum.

Þessi uppskrift gefur uþb. 30 kökur

Til þess að hafa þessa uppskrift glúteinlausa mætti nota glúteinlaust mjöl í staðinn fyrir gróft spelt og glúteinlaust haframjöl.

Hér er fréttin en þar er gefin upp uppskriftin af sigur kökunni, mmmmm hlakka til að prufa hana og hlakka til að fá uppskriftina sem lenti í öðru sæti 🙂

heilsumamman3 Comments

Hafrakökur með valhnetum og dökku súkkulaði

Ef smákökurnar í hverfisbúðinni freista þá skaltu bara smella í þessar þegar þú kemur heim í staðinn ! Þessar kökur eru alveg hrikalega góðar og eiginlega bara ekkert meira um það að segja 🙂

hafrakökur

Hráefni:

  • 1,5 dl kókosolía/ smjör
  • 2 egg
  • 0,5 dl  hrásykur
  • 15 dropar stevía frá Via Health orginal eða vanillu
  • 1 tsk vanilludropar eða 1/2 tsk hreint vanilluduft (t.d. frá Rapunzel)
  • 2,5 dl möndlumjöl
  • 2 tsk lyftiduft (ég nota vínsteinslyftiduft frá Sollu)
  • 6 dl haframjöl
  • 2 dl kókosmjöl
  • 2,5 dl valhnetur
  • 150 gr 70 % súkkulaði

Aðferð:

  1. Hrærið saman í skál: egg, sykri, olíu, vanillu og stevíu
  2. Blandið saman í annari skál: möndlumjöli, haframjöli, kókosmjóli og lyftidufti
  3. Blandið saman blautu og þurru efnunum
  4. Að lokum blandið þið súkkulaðinu og hnetunum saman við
  5. Mótið litlar kökur með skeið (eða höndunum) og bakið í ca 12-14 mín við 180°c  (athugið að ofnar eru mismunandi og stærð á kökunum getur verið mismunandi, fylgist því vel með)
  6. Passið að ofbaka þær ekki, þær mega vera smá mjúkar þegar þið takið þær út úr ofninum.  Það er best að geyma þessar í ísskáp eða í frysti.

hafrakökur

Uppskriftin gefur ca. 40-45 litlar kökur

Ef þið notið glúteinlaust haframjöl eru þessar dýrindiskökur glúteinlausar 🙂 

Athugið að uppskriftin er ekki mjög sæt, ef þið eða börnin eru vön mjög sætum kökum mætti setja aðeins meiri hrásykur eða stevíudropa  en þær eru samt miklu miklu miklu hollari en keyptu kökurnar 😉

heilsumamman1 Comment

Amerískar súkkulaðibitakökur í hollari kantinum

Þessar eru hrikalega góðar og gefa keyptu transfitu-sykur kökunum ekkert eftir í bragði en eru töluvert betri fyrir kroppinn.   Ég hef bakað þær nokkrum sinnum en núna síðast þegar við fjölskyldan fórum í vikuferð í bústað í algera dekurferð og mig vantaði sárlega eitthvað hrikalega gott með morgunkaffinu mínu sem nota bene var oftast drukkið inni í rigningunni.  Ef það hefði verið sól og hiti hefði morgunkaffinu sennilega verið skipt út fyrir kælandi melónusneið 🙂  Það er ótrúlegt hvað veðrið hefur áhrif á fæðuval en það er önnur ella.

Amerískar súkkulaðibitakökur

Hráefni:

  • 150 gr kókosolía eða smjör
  • 1 dl  hrásykur (helst rapdura til að fá svona púðursykur-fíling)
  • 10 dropar af stevíu (eða 1/2 dl af hrásykri til viðbótar)
  • 2 egg
  • 2,5 dl spelt
  • 2,5 dl malaðar möndlur
  • 1 tsk salt
  • 2 tsk lyftiduft
  • 1,5 dl saxaðar hnetur (ég hef notað valhnetur en má nota t.d. heslihnetur, pecan eða jarðhnetur)
  • 150 gr 70 % súkkulaði  (ég hef líka notað 100 gr ef ég á ekki meira og það er bara í fínu lagi)

Aðferð:

  1. Bræða olíuna eða smjörið við lágan hita
  2. Þeyta saman egg og sykur og bæta svo olíunni saman við
  3. Blanda þurrefnunum saman
  4. Blanda þurru og blautu efnunum saman
  5. Bæta við hnetum og súkkulaði
  6. Baka í 10-12 mín við 180°C

Þetta er nokkuð stór uppskrift enda veitir ekki af þar sem þær klárast fljótt 🙂

Ca. 3 plötur / 40 kökur

heilsumammanLeave a comment

Smákökurnar sem fá aldrei samviskubit

Fantagóðar smákökur sem eru sykurlausar, glúteinlausar og mjólkurlausar.  Yfirleitt eru smákökur fullar af smjöri, sykri og súkkulaði…. svo maður spyr sig hvort hinar geti verið góðar.  En ójá, alveg þrælgóðar.  Upphaflega ætlaði ég að gera köku en deigið var orðið svo rosalega þykkt að ég ákvað að gera það bara ennþá þéttara smella því bara í litlar kökur.  Þær eru ekki stökkar eins og smjörkökurnar heldur frekar mjúkar og passa alveg sérstaklega vel með kaffibolla dagsins 😉  Krakkarnir voru alveg vitlausir í þessar kökur svo ég bakaði þær daginn eftir líka.  Frábært hvernig góðar uppgvötanir verða stundum til alveg óvart 🙂

Smákökur

Hráefni:

  • 3 egg
  • 2 dl malaðar möndlur
  • 1 og 1/4 dl kókoshveiti
  • 2 dl döðlur, smátt saxaðar
  • 1 tsk vanilludropar
  • 3 msk hunang / hlynsýróp / agavesýróp
  • 20-25 dropar stevia
  • 4 msk kakósmjör (má líka setja bara meiri kókosolíu)
  • 3 msk kókosolía

Aðferð:

  1. Bræðið kakósmjör og kókosolíu við lágan hita.
  2. Hrærið saman með písk egg, vanilludropa, steviu og hunang.
  3. Blandið kókosolíunni og kakósmjörinu saman við eggjablönduna.
  4. Blandið saman möndlum og kókoshveiti og hrærið saman við.
  5. Saxið döðlurnar smátt og blandið saman við.
  6. Mótið litlar kökur og notið gaffal til að fletja þær örlítið út.
  7. Bakið við 180°c í ca 13 mín.

Uppskriftin gefur ca. 30 kökur

heilsumamman2 Comments