Án sykurs – Heilsumamman

Hnetu trufflur

Ég er orðin frekar leið á hnetukúlum í öllum útgáfum, þær eru alveg góðar en ég hef bara gert þær aðeins of oft. Svo um daginn þá langaði mig í eitthvað gott …eins og svo oft áður 😉 En þar sem við vorum í bústaðnum var ekkert mikið af hráefni til að velja um. Þar kviknaði þessi hugmynd sem sló í gegn og hefur verið gerð nokkrum sinnum síðan. Hráefnið er það sama og í “gömlu” kúlunum en aðferðin er önnur sem tekur kúlurnar upp á næsta level.

Hráefni:

1 bolli döðlur
1/3 bolli kakó
2-3 msk kakósmjör (brætt)
1 tsk vanilludropar eða 0,5 tsk vanilluduft
0,5 tsk himalyjasalt
1 bolli grófsaxaðar hnetur að eigin vali (má setja hvað sem er svo sem kókosflögur eða rúsínur)!

Aðferð:

Leggjið döðlurnar í bleyti í smástund, hellið vatninu af og maukið með töfrasprota
Bræðið kakósmjörið við mjög lítinn hita eða yfir vatnsbaði og bætið saman við döðlumaukið
Bætið kakói, salti og vanillu saman við og blandið vel saman
Blandið hnetunum saman við
Mótið litlar kúlur (þið gætuð þurft að stinga deiginu inn í ísskáp í smástund ef það er of lint)
Veltið kúlunum upp úr kakói og kælið

Í þessari uppskrift er kakósmjörið algert möst, því það breytir döðlumassanum í súkkulaðimassa !

Njótið 🙂

ágúst 23, 2013

heilsumammanLeave a comment

Smákökurnar sem fá aldrei samviskubit

Fantagóðar smákökur sem eru sykurlausar, glúteinlausar og mjólkurlausar. Yfirleitt eru smákökur fullar af smjöri, sykri og súkkulaði…. svo maður spyr sig hvort hinar geti verið góðar. En ójá, alveg þrælgóðar. Upphaflega ætlaði ég að gera köku en deigið var orðið svo rosalega þykkt að ég ákvað að gera það bara ennþá þéttara smella því bara í litlar kökur. Þær eru ekki stökkar eins og smjörkökurnar heldur frekar mjúkar og passa alveg sérstaklega vel með kaffibolla dagsins 😉 Krakkarnir voru alveg vitlausir í þessar kökur svo ég bakaði þær daginn eftir líka. Frábært hvernig góðar uppgvötanir verða stundum til alveg óvart 🙂

Hráefni:

3 egg
2 dl malaðar möndlur
1 og 1/4 dl kókoshveiti
2 dl döðlur, smátt saxaðar
1 tsk vanilludropar
3 msk hunang / hlynsýróp / agavesýróp
20-25 dropar stevia
4 msk kakósmjör (má líka setja bara meiri kókosolíu)
3 msk kókosolía

Aðferð:

Bræðið kakósmjör og kókosolíu við lágan hita.
Hrærið saman með písk egg, vanilludropa, steviu og hunang.
Blandið kókosolíunni og kakósmjörinu saman við eggjablönduna.
Blandið saman möndlum og kókoshveiti og hrærið saman við.
Saxið döðlurnar smátt og blandið saman við.
Mótið litlar kökur og notið gaffal til að fletja þær örlítið út.
Bakið við 180°c í ca 13 mín.

Uppskriftin gefur ca. 30 kökur

ágúst 7, 2013janúar 13, 2014

heilsumamman2 Comments

Súkkulaði-hnetukaka með súkkulaði-bananakremi

Það sem er svo yndislegt við hrákökur er það er hægt að útbúa þær á örskotstundu þar sem það þarf ekki að baka þær. Í síðustu viku fengum við mæðgunar góða gesti eftir leikskóla og ég átti bókstaflega EKKERT til að bjóða upp á og ætlaði að fara að bretta upp ermarnar og fara að baka en þar sem ég var eiginlega orðin alltof sein skellti ég í eina hráköku. Eftir 15 mínútur var kakan tilbúin. Mér finnst það svo dásamlegt að getað fengið mér svona köku og veit að um leið er ég að næra líkamann með hrikalega góðri næringu. Semsagt bara tóm hamingja og skemmtilegt að lífga upp á hversdagsleikann með þessum hætti 🙂

Þetta er sami botninn og ég gerði þegar ég gerði Súkkulaðisælu með mangó-og hindberjum en í þetta sinn átti ég ekki mangó en viti menn ég átti einmitt fallegt og þroskað avacado sem breytti sér í dýrindis súkkulaðikrem 🙂

Botninn:

1 bolli valhnetur
1 bolli cashewhnetur/ pecanhnetur
1/4 – 1/2 bolli hreint kakó (eftir því hversu dökkan þið viljið hafa botninn)
1 bolli döðlur (látið liggja í bleyti í smástund svo verði mjúkar)
Smá salt (himalayja eða sjávarsalt)
Smá vanilla

Hneturnar settar í matvinnsluvél og malaðar, kakóinu bætt við og svo einni og einni döðlu í einu. Að lokum vanillu og salti. Sett á disk, mótaður hringur og sett inn í frysti meðan kremið er gert.

Ef þið eigið ekki matvinnsluvél má mala hneturnar í lítilli matvinnsluvél (svona chopper sem fylgir oft með töfrasprotum) og mauka döðlurnar með töfrasprotanum og blanda að lokum öllu saman.

Kremið:

1 þroskað avacado
1 þroskaður banani
2-3 msk hreint kakó
1-2 msk kókosolía
2 msk einhver góð sæta (hunang, agave, hlynsýróp)
smá vanilla

Allt sett í skál og unnið með töfrasprota þangað til slétt og fallegt. Smakkið til og breytið eftir smekk, meira kakó eða meiri sæta, smá salt, bara finna það sem ykkur finnst gott 🙂

Setjið kremið á kökuna og inn í frysti/ísskáp í smá stund.

Svo er bara að finna eitthvað til að skreyta með, ég fann nokkur frosin hindber og kókosflögur.

Þetta er fínasta seinnipartskaka, fínasti desert og góð ef sykurþörfin er að fara með fólkið yfir sjónvarpinu, bara við öll tækifæri 🙂

Verði ykkur að góðu 🙂

október 25, 2012mars 5, 2013

heilsumamman2 Comments

Sítrónu- kókos morgunverðarkaka

Gerði þessi stykki nú í vikunni og þvílík dásemd. Með því að nota glúteinlausa hafra eru þau glúteinlaus, auk þess að vera án viðbætts sykurs og Chia fræin eru ofurfæða og eru sneisafull af kalki, Omega3 ofl. Ég skal vera hreinskilin, þetta er svona pínu maus uppskrift, sem ég er yfirleitt ekki mjög hrifin af því ég vil helst hræra öllu hráefninu saman í eina skál og hella í mót en ég á pottþétt eftir að gera þessa mjög oft. Þetta er svona á milli þess að vera kaka og orkubar. Gaman að gefa krökkunum holla köku um helgina sem er full af næringu, góð orkustykki fyrir þá sem eru í framkvæmdum og geggjað í helgar-morgunmatinn 🙂

Upprunalega uppskriftin er frekar lítil svo ég tvöfaldaði hana og veitti ekki af því hún féll í mjög góðan jarðveg 🙂

Tvöföld uppskrift:

3 msk Chia fræ
6 msk sítrónusafi
2 bollar haframjöl – malað
Smá salt
1 tsk vínsteinslyftiduft
1,5 bolli (ca 3,5 dl) Kókosmjöl
4 msk sítrónubörkur
4 msk kókosolía (fljótandi)
4 msk eplamús (ég smellti bara epli í pott og gufusauð í nokkrar mín og stappaði með gaffli)
½ bolli Hunang eða Agave sýróp (má alveg minnka aðeins ef ykkur finnst þetta of mikil sæta)
1 bolli döðlur smátt skornar
4 msk kókosmjöl

Aðferð:

Leggið Chia fræin í bleyti í sítrónusafanum og leyfið þeim að drekka í sig sítrónusafann í ca 15 mín
Ef þið eigið ekki tilbúna eplamús, skrælið þá epli og gufusjóðið í nokkrar mínútur
Malið haframjölið í matvinnsluvél
Saxið döðlurnar smátt
Rífið niður sítrónubörk
Blandið saman haframjölinu, kókosmjölinu, saltinu og lyftiduftinu.
Blandið saman Chia fræjunum, eplamúsinni, hunangi/sýrópi, kókosolíunni og döðlunum (smá tips, ef þið gufusuðuð epli þá bráðnar kókosolían þegar þið blandið þessu öllu saman 😉 )
Blandið svo blautu efnunum saman við þurru efnin og blandið þangað til allt er búið að samlagast.
Setjið deigið á bökunarplötu og stráið kókosmjölinu yfir.
Bakið v/ 150° í 25-28 mín

Njótið 🙂

Það er alveg spurning um að gera 2x tvöfalda næst og ná í fulla ofnskúffu. Þá endist skammturinn kannski lengur en í 2 daga 🙂

september 29, 2012mars 15, 2013

heilsumamman2 Comments

Súkkulaðisæla með mangó og hindberjum

Hvað á til bragðs að taka þegar klukkan er orðin fjögur á sunnudegi, sykurþörfin alveg að fara með mann og eitthvað lítið til í kotinu? Síðasta sunnudag fór eiginmaðurinn í Bónus til að kaupa kaffi og bauðst til þess að koma við í bakaríinu en ég sannfærði hann (að lokum) um það að ég væri jafnfljót að búa til eitthvað gott (og hollt) og hann að fara út í búð. Útkoman varð súkkulaðikaka með mangó/hindberja kremi. Þetta var eiginlega samsuða úr 2 áttum með eigin útfærslu og já tók ekki nema uþb. 15 mín. Þetta er bara hrein og klár hollusta og gleði fyrir kroppinn. Hún sló í gegn hjá barnaskaranum og ég get ekki beðið eftir næsta sunnudegi til að gera hana aftur 🙂

Botninn:

½ bolli valhnetur
½ bolli cashewhnetur
½ bolli hreint kakó
1 bolli döðlur (látið liggja í bleyti í smástund svo verði mjúkar)
Smá salt (himalayja eða sjávarsalt)
Smá vanilla
1-2 tsk kókosolía (mjúk)
1 msk hunang

Aðferð:

Hneturnar settar í matvinnsluvél og malaðar, kakóinu bætt við og svo einni og einni döðlu í einu.
Að lokum kókosolíu og hunangi, ásamt vanillu og salti.
Sett í mót, klæddu með bökunarpappír og þrýst niður.

Kremið:

1/2 þroskað og safaríkt mango
0,75 dl frosin hindber
1 msk hunang
Smá vanilla

Sett í blandara eða mini matreiðsluvélina og maukað saman. Smurt yfir kökuna.

Ofan á:

0,75 dl frosin hindber
½ mango, saxað niður
25 gr 70 % súkkulaði saxað
Handfylli af kókosflögum

Það þarf náttúrulega ekki að taka það fram að þessi sæla bragðast sérstaklega vel með smá rjómaslettu.

september 21, 2012mars 15, 2013

heilsumamman1 Comment

Pecan-súkkulaði hrákaka

Þessi er alveg geggjuð. Þvílíkur súkkulaði draumur. Uppskriftina klippti ég út úr blaði frá Maður Lifandi en breytti uppskriftinni reyndar pínu lítið, auk þess að bæta við einu lagi af súkkulaði 🙂 Ég gef ykkur útgáfuna eins og ég hef gert hana.

Botninn:

200 gr pecan hnetur
50 gr heslihnetur
180 gr döðlur
80 gr kókosmjöl
60 ml kókosolía
20 gr kakóduft
smá sjávarsalt

Allt sett í matvinnluvél og unnið vel, sett í form og kælt.

Fylling:

250 gr Kasjúhnétur (lagðar í bleyti í 4-6 klst og vatninu svo hellt af)
85 gr kakóduft
100 ml agavesýróp
120 gr kókosolía
1 tsk vanilluduft
Vatn, 100- 250 ml (eins lítið og þið komist af með, fer eftir blandaranum)

Allt sett í blandara og blandað þar til silkimjúkt. Hellt ofan á botninn og sett í frysti.

Ofan á: (þarf ekki en er alveg rosalega gott)

1-1,5 dl kakó
1 dl agave
1 dl kókosolía
1 dl kakósmjör
smá vanilla
örlítil himalayjasalt

Bræðið kakósmjörið yfir vatnsbaði, bætið öllu saman við og hrærið vel. Smyrjið ofan á kökuna og kælið.

Ég ákvað að bæta við fleiri myndum af þessari yndislegu köku, er búin að baka hana 2x núna með stuttu millibili og það sem mér þykir hún góð 🙂 Þegar þessar myndir voru teknar, setti ég ekki súkkulaði lagið ofan á, heldur brytjaði niður fullt af ávöxtum og setti svo örlítið brætt súkkulaði ofan á.