Category: Ég mæli með

Eins og flestir vita sem fylgjast með því sem ég er að gera þá er með námskeiðin mín í Spírunni í Garðheimum.  Spíran er frábær veitingastaður sem býður upp á næringarríkan mat og allt búið til frá grunni.  Það er bæði hægt að fá þar grænmetisrétti, kjötrétti og fisk.  Semsagt eitthvað fyrir alla.

Fyrir nokkru byrjaði Spíran að bjóða upp á helgar Brunch.   Ég fór ásamt eiginmanninum og prófaði og vááá  hvað þetta er flott.  Ég snappaði heimsóknina og ég veit að fólki leist svo vel á að einhverjir hafa þegar farið.   Mig langaði bara að segja ykkur frá þessu þar sem gæðin voru í algeru fyrirrúmi en jafnframt skilst mér að þetta jafnframt ódýrasti Brunchinn í bænum.  Eiginmaðurinn gat ekki hætt að tala um hvað beikonið væri gott og hvað allt væri gott.  Ég held að hann hafi ekki verið búin að gera svo miklar vonir og hélt að við værum að fara á einhvern “heilsustað” (já við hjónin erum ekki alveg sammála þegar matur er annars vegar).

Það sem var svo skemmtilegt var að það var bæði hægt að fá sér chia/hafra graut, grænan safa og gularótar/engifer safa, bakað grænmeti, fullt af ávöxtum en en svo var næsti maður kannski með  mini hamborgara, beikon og frech toast.  Já algerlega eitthvað fyrir alla.

En ég læt bara myndirnar tala sínu máli

Já ég prófaði margengstertuna með kaffinu og jú ég var í smá sykursjokki á eftir, en sem betur fer var þetta bara lítil sneið og ég hlaut engan varanlegan skaða af 😉  Smá sunnudagstrít ásamt Creme brulé og gæða ostum.

Mæli 100 % með heimsókn í Helgarbrunch í Spírunni 🙂

Við létum loksins verða af því að kíkja í nýju ísbúðina Joylato um síðustu helgi.   Frá því að ég sá hana fyrst auglýsta er ég búin að vera á leiðinni.  En já, loksins kom gott tækifæri, bongoblíða (eða kannski meira svona frost og blíða), við skelltum okkur í bíltúr, allt gamalt brauð hreinsað úr frystinum og tekinn smá göngutúr í kringum lækinn og gefið öndunum.   Ræddum einmitt um það af hverju maður gefi öndunum brauð, ég meina af hverju ekki bara grænkál frekar,  þegar þær eru svangar á sumrin éta þær væntanlega grænan sjávargróður og fleira sem vex, þær skreppa ekki í bakaríið!   En nóg um það, þær virtust bara nokkuð saddar og glaðar með þetta fóður.

Ísbúðin er sú eina sinnar tegundar hér á Íslandi og gaman að prófa eitthvað alveg nýtt.   Hægt er að fá kókossís eða ís úr ógerilsneiddri nýmjólk frá Erpsstöðum.  Bara það að fá ís er ákveðið sjónarspil, hráefnið sem er fljótandi er hellt í hrærivélaskál og svo er notað köfnunarefni til að frysta ísinn.  Þið sem eruð ekki búin að fara ættuð eiginlega bara að skella ykkur til að skilja hvað ég meina.  Ef ég hefði verið aðeins fyrirhyggjusamari hefði ég jafnvel tekið upp myndskeið, en ég var bara svo forvitinn að fylgjast með að ég áttaði mig ekki á því.

Ísinn var virkilega bragðgóður, við fengum okkur öll kókosgrunn, við smökkuðum bláberjaís, saltkaramellu og súkkulaði og ég held að súkkulaðiísinn hafi haft vinninginn að mínu mati.  Þessi ís er aðeins dýrari en annar ís en á móti kemur að öllum leið dásamlega vel í magnum á eftir sem er ekki alltaf hægt að segja.

Þetta var klárlega fyrsta ferðin af mörgum,

Lækurinn dásamlegi í Firðinum fagra…

Svo var kíkt í ísbúðina…

Kannski er betra að láta fylgja með hvar ísbúðin er staðsett.  En hún er staðsett í Mamma veit best, Laufbrekku 30, Kópavogi.  Þið getið kíkt á heimasíðuna  http://joylato.is/

Takk fyrir að bjóða upp á svona frábæran ís og við komum klárlega aftur 🙂

(Ath. þessi póstur er ekki auglýsing bara okkar upplifun 🙂

Um daginn dreif ég mig loksins á námskeið sem ég var búin að hafa augastað á lengi en hvorki gefið mér tíma né tímt að fara.  En í hvert skipti sem ég sá auglýsingu á facebook fékk ég alltaf pínu fiðrildi í magann og horfði á dagatalið… ætti ég að skella mér í þetta skiptið ?  En LOKSINS lét ég verða af því og fór á tælenskt matreiðslunámskeið í Salt Eldhús.

Ég var sko ekki svikin.  Námskeiðið var skemmtilegt og fræðandi og maturinn var geggjaður.  Stemmingin var ótrúlega góð og eftir námskeiðið sátum við og borðuðum þennan yndislega mat og skoluðum niður með eðal hvítvíni og þetta mynti frekar á saumaklúbb frekar en námskeið á tímabili.

Ég er hrifin af tælenskum mat, hann er léttur og mikið grænmeti notað.  Ég verð þó að viðurkenna að ég nota svona 10 % af uppgefnu chilli magni í þeim uppskriftum sem ég fékk 😉   Tælensku uppskriftirnar eru líka yfirleitt frekar hollar en það er helst að passa ap lesa vel utan á tilbúin mauk (paste) og sósur því þau eru mismunandi, sum innihalda t.d. MSG (E-621) en önnur ekki.

Ég læt fylgja nokkrar myndir frá kvöldinu:

Allt gert klárt fyrir aðal eldamennskuna

Nauðsynlegt að pósa aðeins fyrir myndavélina

Hrönn Hjálmars vinkona mín fór með mér á námskeiðið, en hún er einmitt með frábæra matarsíðu sem er stútfull af hollum og góðum uppskriftum, endilega kíkið á hana: https://hronnhjalmars.wordpress.com/

Og svo byrjaði fjörið

Hluti af 8 réttunum sem við bjuggum til

Eigum við eitthvað að ræða þetta frekar…

Og svo var sest og notið matarins…ekkert smá huggulegt 🙂

Mæli svo sannarlega með  þessu námskeiði, ég er nú þegar búin að elda flesta réttina sem við gerðum um kvöldið og eiginmaðurinn er sáttur við fjárfestinguna og börnin líka.  Fjölskyldan er mjög ánægð með að fá eitthvað nýtt á matarborðið og ég ánægð með að spreyta mig á nýjum áskorunum.

Nú er bara að ákveða hvaða námskeið verður fyrir valinu næst…